सोलारमाँटे २० मिनेटयाँ नइ चार्‌ज भइलाहार ल्यापटप अइल।

Lenovo इँ आफ्नो लओ Yoga Solar PC ल्यापटप बजारयाँ आन्ल बाटइ। इसे ल्यापटपक मुख्य विसेसता कहल इख्‌र ढक्कनयाँ भइल सउर्‌य प्यानल हो, जनइँ घामक प्रकासमाँटे सक्ति सङ्कलन करिकुन बेटारी चार्‌ज करिके सकित्। अरू प्रकासक माँटे पनि चार्‌ज करिके सक्लाहार भइने पनि, सिधा घामक ज्योतिमाँटे सबइकहते छिटो चार्‌ज भइत ।

इसे ल्यापटपयाँ ८४ ओटा सउर्‌य सेलहरू बाटइ, जनइँ २४% कहते बढि पावरेइँ घामक सक्ति सङ्कलन करिके सकित्। सिधा घामक प्‌रकासयाँ २० मिनेट चार्‌ज कर्‌तेखेना करिब एक घण्टासम्म भिडियो चालाइके सकित्।

सक्तिसालि प्रोसेसर र हल्का डिजाइन

Yoga Solar PC याँ Intel क लुनार लेक प्रोसेसर, ३२GB RAM, १TB स्टोरेज, र १४-इन्च OLED डिस्प्ले राख्ल बाटइ । इख्‌र मोटाइ मात्‌र १५ मिलिमिटर बाटिक् र ओजन करिब १.०४ किलोग्‌राम भइल भइते इसे बोकिके एकदम सजिलो बाटइ।

इयाँ Lenovo क डायनामिक सोलार ट्‌र्‌याकिङ सिस्टम सफ्टवेयर पनि बाटइ, जनइँ चालालाहार मानुसके आइरहल उजुङ्ग धेरइ कहते धेरइ उपयोग कारिके सहयोग करित्। इसे सिस्टमेइँ सउर्‌य प्यानलेइँ कत्का सक्ति उत्पादन करिरहल बाटइ कइपनि देखालाहार सुबिधा पनि देहेल बाटइ।

घुमिरहलाहार र दुर्‌गम ठाउँयाँ बस्लाहारक लागि उपयुक्त भइत्

Lenovo क अनुसन्धान कर्‌लाहारि डा. एलेना कार्‌टर कहित्,

“हायँ यस्न खाले ल्यापटप बानालाटिहिँ , जनइँ केवल २० मिनेटक घामक उजुङ्याँ चार्‌ज भइकुन पुरइ दिनभरि काम करिके सकित्।”

इसे ल्यापटप खासकरिकुन् घुमघाम करिरहलाहार र टाढो भइलाहार, अनि बिजुलि सुविधा कम भइल ठाउँहरूयाँ उपयुक्त भइत् ।

हरित प्‌रविधितपट्टिक एक्टा बुड्को कदम

सउर्‌य सक्तिमाँटे चल्लाहार Yoga Solar PC हरित प्‌रविधितपट्टिक बुड्को फड्को हो। इघाइँ बिजुलि खपत घाटालाहार मात्‌रइ हइन, विद्युतिय प्रदुसन पनि कम कारित्। वातावरनविद्हरूइँ इसे प्‌रविधिके भविस्यक लागि निकइ महत्त्वपुर्‌न कहल बाटत्।