तनहुँ, साउन २० — दक्छिन कोरियायाँ भइल दुक्टा अन्तर्रास्ट्रिय तेक्वान्दो प्रतियोगितायाँ नेपालि खेलाडि राज कुमार दरइँ एक स्वर्न र दुक्टा कास्य पदक जित्तिहिन अन्तर्रास्ट्रिय मन्चयाँ नेपालके गउरवान्वित बानाहाल बाटत्। ओनेन पहिलो प्रतियोगिता २०२५ विश्व ओलम्पिक्स तेक्वान्दो च्याम्पियनसिपयाँ सहभागि भइलरहत्, जन खेल २०२५ जुन २६ माँटे २९ तारिखसम्म कोरियाक मुजुयाँ भइल रहि। उसे प्रतियोगितायाँ ओनेनेइँ एकल पुम्से विधायाँ एक कास्य पदक र सिनियर ग्योरोगि (फाइट) ६८–७२ केजि तउल समुहयाँ आर्क कास्य पदक हात पारिके सफल भइल रहत्।
पाछेइँ, दरइँ २०२५ जुलाई १३ क दिन कोरियाक राजधानि सियोलयाँ कुक्किओन (तेक्वान्दोक विस्ओ मुख्यालय) याँ आयोजना भइल आर्क प्रतियोगिता, United Nations Association of Republic of Korea World Peace Taekwondo Championship याँ सहभागिता जानाहाल। उसे प्रतियोगिताक सिनियर–२ (३०–३९ वर्स) उमेर समुहक व्यक्तिगत पुम्से विधायाँ ओनेनेइँ एकदमइ राबुर्न प्रदर्सन कर्तिहिन स्वर्न पदक जितिके सफल भइल्।
यसेकरिकुन राज कुमार दरइँ छोटो समयकाँ दुक्टा अन्तर्रास्ट्रिय प्रतियोगितामाँटे तिन्टा पदक जितिकुन नेपाल पटिमाँटे गउरवपुर्न उपस्थिति जानाहाल बाटत्। ओनेनक इसे सफलता केबल व्यक्तिगत उपलब्धि हइन, सबइ नेपालि तेक्वान्दो खेलछेत्रक लागि प्रेरनाक स्रोतसमेत बन्ल बाटइ। ओनेनेइँ देखाहाल लगनसिलता, निस्ठा र खेलप्रतिक समर्पन नेपालि खेलकुदक उजुङ् भविस्यपटि संकेत करित्।
Darai 
Nepali