६.१ म्याग्निच्युडक भुइँचालो जइल, सिन्धुपाल्चोक केन्द्‌रबिन्दु

फागुन १६, २०८१ (फेब्‌रूअरी २८, २०२५) सुक्‌रबार बिहान २ बजिकुन् ५१ मिनेटयाँ सिन्धुपाल्चोक जिल्लाक भैरवकुन्ड आसपास केन्द्‌रबिन्दु बानाइकुन ६.१ म्याग्निच्युडक भुइचालो जइल बाटइ। रास्ट्‌रिय भुकम्प मापन तथा अनुसन्धान केन्द्‌रक अनुसार, इसे भुइँचालोक धक्का काठमान्डउ उपत्यका, पुर्‌बि र मध्ये नेपालक कोहि जिल्ला, र भारतक बिहार अनि पस्चिम बंगालसम्मन् महसुस भइल रहि।

भुइँचालोइँ कर्‌तेखेना सिन्धुपाल्चोक जिल्लायाँ सामान्य छ्यति भइल बाटइ। भोटेकोसि गाउँपालिका–३ दुगुनागढियाँ पहिरो खस्ल बाटइ कहने कोदारियाँ भइल पुलिस चौकीक भित्ता चिरा पर्‌ल बाटइ। आत्तिकुन भाग्तेखेना एक्टा कैदिक हात टुट्ल र उख्‌र जिल्ला अस्पतालयाँ उपचार भइरहल बाटइ। एखेनसम्मन् क्याहु बुड्को मानविय क्षतिक रिपोर्‌ट नइजे अइल बाटइ ।

इसे कहते आघु, पुस २३ गते चिनयाँ ६.८ म्याग्निच्युडक भुइँचालो जइते नेपाल, भारत, र बंगलादेससम्म धक्का महसुस भइल रहि। नेपाल भुकम्पिय द्‌रिस्टिकोनेइँ संवेदनसिल छ्येत्‌र भइतेखेना, विज्ञहरूइँ आगामि दिनहरूयाँ पराकम्पहरू आइके सक्लाहार चेतावनि देहेल बाटत् र सतर्‌क भइन् बसिके आग्‌रह कर्‌लबाटत् ।