यदि हायँ कहेँ पनि उत्तानो नइसुत्ल कहने क्या भइत्?

निद् मानुसक सारिरिक तथा मानसिक स्वास्थ्यक लागि एकदमइ आवस्यक कुरा हो। निँदके धेरइ हदसम्म हाम्‌र सुत्लाहार तरिकाइँ असर पुरेइरहल भइत् । हायँ विभिन्न आसनयाँ सुत्थाइर्—कहेँ छाति पट्टि फर्‌किकुन, कहेँ कोल्टो (side) परिकुन त कहेँ उत्तानो (supine) अर्थात् पिँठि पट्टी फर्‌किकुन। यदि हायँ कहेँनि उत्तानो नासुतिर कहने हाम्‌र स्वास्थ्ययाँ क्या-कस्न असर परिके सकित्? इसे लेखयाँ यहि विसययाँ विवेचना कर्‌थाइर।

१. मेरुदन्ड र पोस्चरयाँ असर

उत्तानो सुत्ने मेरुदन्ड (spine)क प्‌राक्‌रितिक स्थिति ठिक भइत्, जनइँ कर्‌तेखेना पिँठियाँ दबाब कम भइत्। यदि कोहि मानुस कहेँनि उत्तानो नासुत्लाहार हो कहने, उख्‌र मेरुदन्डयाँ असन्तुलन देखा परिके सकित्, जनइँ कर्‌तेखेना स्थायि रूपयाँ पिँठि बोथ्लाहार समस्या आनिके सकित्। खास करिकुन, सधइ छाति वा पेट पट्टि फर्‌किकुन सुत्तेखेना गर्‌दन र पिँठियाँ अनावस्यक तनाव बनिके सकित्।

२. सास फेर्‌लाहार प्‌रनालीयाँ असर

उत्तानो सुत्ते फोक्सोयाँ हावा स्वतन्त्‌र रूपयाँ बगिके जाइके सकित्। तर, कोल्टो वा उल्टो (प्‌रोन) सुत्तेखेन सास फेर्‌लाहार प्‌रनालीयाँ चुत्कि दबाब परिके सकित्। कनकन मानुसहरूके, खास करिकुन दमक बिरामिहरूयाँ, उत्तानो नसुत्नेपार सास फेरिके अस्कार भइके सकित्।

३. मुटुक स्वास्थ्ययाँ असर

अनुसन्धानहरूइँ देखाहाल बाटइ कि उत्तानो सुत्तेखेना जेनयाँ रगतक प्‌रवाह राबुर्‌न भइत्। यदि कोही सधइँ छाति पट्टि फर्‌किकुन वा कोल्टो परिकुन् सुत्लाहार हो कहने उख्‌र मुटुक कामयाँ असर परिके सकित्। खासकरिकुन, उच्च रक्तचाप भइल मानुसहरूके उत्तानो नासुत्लाहार हो कहने स्वास्थ्यक लागि हानिकारक भइके सकित्।

४. छालासम्बन्धि समस्या

यदि हायँ सधइँ छाति वा कोल्टो सुत्लाहार हो कहने, अनारक छाला बढि धस्सिके सकित्। ओसो भइतेखेना अनारयाँ चाउरी, डन्डिफोर (acne), वा छालाक रङ फेरिके सक्लाहार सम्भावना भइत्। उत्तानो सुत्नेपार अनारयाँ धसाइ कम भइलाहार भइते खेना छालाक स्वास्थ्य राबुर्‌न भइत्।

५. गर्‌भवति बेटिक लागि समस्या

बेटि गर्‌भवति भइल बेलयाँ चिकित्सकहरूइ गर्‌भवती बेटिहरूके लाँबो समयसम्म एकइ प्‌रकारेइँ सुत्लाहार अवस्थामाँटे जोग्गिके सल्लाह देथात्। उत्तानो सुत्तेखेना रक्तसन्चार राबुर्‌न भइलाहार भइतेखेना गर्‌भवति बेटिहरूके कहेँकहेँ यस्न आसनयाँ सुतिके सुझाव देथाइर्। यदि ओनेन् कहेँ पनि उत्तानो नासुतत् कहने छावाके अक्सिजन नापुगिके सकित्।

सुत्लाहार तरिकाइँ हाम्‌र स्वास्थ्ययाँ सिधइ असर पार्‌ल भइत्। उत्तानो सुतिके छाड्तेखेना पिँठिक बोथाइ, सास फेरिके अस्कार भइलाहार, मुटु सम्बन्धि समस्या, छालाक समस्या, तथा गर्‌भवति बेटिहरूके जटिलता आइके सकित्। ओसेभइते, स्वस्थकर निदक लागि फरक फरक सुत्लाहार तरिकाहरू फेर्‌थिन् सुतिके राबुर्न भइत् ।

हायँ कहेँनि उत्तानो नासुत्लाहार हो कहने, हाम्‌र ज्यानक स्वास्थ्ययाँ नकारात्मक असर परिके सक्लाहार सम्भावना धेरइ भइत् । ओइभइतेखेना, फरक फरक सुत्लाहार आसनक समायोजन करिके परित् ताकि हाम्‌र स्वास्थ्यके सन्तुलित राखिके सकियोस्।