ट्रम्पले मन्त्री एलन मस्कको अधिकार सिमा तोकेः हैसियतभित्र रहेर काम गर्नु -ट्रम्प

राष्ट्रपति डोनाल्ड ट्रम्पले आफ्नो मन्त्रिपरिषद्का सदस्यहरूसँग बैठक गरी स्पष्ट गरे कि विभागहरूको नेतृत्व मन्त्रीहरूले गर्नेछन्, न कि एलन मस्कले।

मार्च ४, २०२५ मा वाशिंगटन डीसीस्थित अमेरिकी क्यापिटलको हाउस चेम्बरमा कांग्रेसको संयुक्त सत्रमा ट्रम्पले सम्बोधन गर्ने क्रममा मस्कले भीडलाई अभिवादन गरे।

बिहीबार, ट्रम्पले मन्त्रिपरिषद्को बैठकमा प्रशासनका शीर्ष अधिकारीहरूलाई जानकारी गराउँदै भने कि मस्कलाई विभागहरूलाई सिफारिस गर्न सक्ने अधिकार छ, तर कर्मचारी व्यवस्थापन र नीति निर्माणमा अन्तिम निर्णय गर्ने अधिकार छैन। बैठकमा मस्क पनि उपस्थित थिए।

टेस्लाका संस्थापक मस्कले नेतृत्व गरेको सरकारी दक्षता विभाग (DOGE) ले हालै सरकारी कर्मचारीहरूको सामूहिक बर्खास्तीको निर्णय गरेको थियो, जसले संघीय प्रशासनमा ठूलो अन्योल सिर्जना गरेको छ। DOGE का यी कदमहरूविरुद्ध अदालतमा चुनौती दिइएको छ भने डेमोक्र्याटिक र केही रिपब्लिकन सांसदहरूले आलोचना गरेका छन्।

ट्रम्पको यो निर्देशन मस्कको अधिकारलाई सीमित गर्ने पहिलो ठोस कदमका रूपमा आएको छ। ट्रम्पका अनुसार, DOGE ले सल्लाहकारको भूमिका मात्र खेल्नुपर्छ, तर अन्तिम निर्णय मन्त्रिपरिषद्का सचिवहरूले गर्नेछन्।

बैठकमा मस्कले ट्रम्पको निर्देशनलाई स्वीकार गरे र DOGE का केही निर्णयहरूमा गल्ती भएको कुरा समेत स्विकारे। उनले यसै हप्ताको सुरुमा कांग्रेसका सदस्यहरूसँग पनि यो स्वीकारोक्ति गरेका थिए।

ट्रम्पले सरकारमा योग्य कर्मचारीहरूलाई जोगाइराख्ने पक्षमा आफू रहेको बताए। तर पछिल्ला केही साताहरूमा उनका प्रशासनले हजारौं संघीय कर्मचारीहरूलाई जागिरबाट हटाइसकेको छ। संघीय अदालत र निजामती सेवा बोर्डका प्रमुखले यी बर्खास्तीहरू कार्यसम्पादनसँग सम्बन्धित नभएको र सम्भवतः कानुनी उल्लङ्घन भएको ठहर गरेका छन्।

नयाँ निर्देशानुसार, हटाइएका कर्मचारीहरूलाई पुनः जागिरमा राखिने कि नराखिने भन्ने अझै स्पष्ट भइसकेको छैन।

ट्रम्पले बैठकपछि ट्रुथ सोशलमा पोस्ट गर्दै यस्ता बैठकहरू प्रत्येक दुई हप्तामा गर्ने बताए।

“विभागीय सचिवहरूले आफ्नो मातहतका कर्मचारीहरूलाई बुझ्ने क्रममै, को रहने र को जाने भन्ने निर्णय गर्न सक्नेछन्,” उनले लेखे। “हामी ‘ह्याचेट’ होइन, ‘स्काल्पेल’ प्रयोग गर्छौं। मस्क, DOGE, र अन्य दक्ष व्यक्तिहरू मिलेर ऐतिहासिक काम गर्न सक्षम हुनेछन्।”

पत्रकारहरूसँग कुरा गर्दै ट्रम्पले भने कि उनी क्याबिनेट सदस्यहरूले आवश्यक कर्मचारीहरूलाई कायम राखोस् भन्ने चाहन्छन्, तर कटौती आवश्यक भएको बताए। उनले भने, “यदि सचिवहरूले कटौती गर्न सके, राम्रो। नभए, मस्कले त्यसको जिम्मा लिनेछन्।”